Могилёвский областной исполнительный комитет МОГИЛЕВСКИЙ
ГОСУДАРСТВЕННЫЙ УНИВЕРСИТЕТ ПРОДОВОЛЬСТВИЯ Могилевский институт МВД Республики Беларусь

“Свет дзяцінства”

Наведванне мастацкага музея імя В.К. Бялыніцкага-Біруля “Свет дзяцінства”
Сумленнасці трэба вучыцца ў маленькіх дзяцей,
пакуль яны не навучыліся ад нас несумленнасці.
Казімір Камейша

          Як мала чалавеку трэба для радасці. Добрая кніга, цёплая сустрэча з сябрамі, запланаваны выхад у тэатр, музей, на выставу — гарант узнёслага настрою і новых адкрыццяў у жыцця кожнага чалавека. Так, вучні 5 “В” класа дзяржаўнай установы адукацыі “Сярэдняя школа № 31 г. Магілёва” наведалі мастацкі музей В.К. Бялыніцкага-Біруля, які гасцінна запрашаў магіляўчан і гасцей горада на тэматычную выставу “Вітольд Каэтанавіч Бялыніцкі-Біруля і мастакі яго асяроддзя”.
          В. К. Бялыніцкі-Біруля — найбуйнейшы беларускі  жывапісец-пейзажыст, які вывеў жанр беларускага пейзажнага жывапісу на ўзровень еўрапейскай класікі.   На выставе былі прадстаўлены творы са збору Дзяржаўнай Траццякоўскай галерэі і Нацыянальнага мастацкага музея Рэспублікі Беларусь. Музей, адноўлены пасля рэстаўрацыі, сапраўды ўражвае глыбінёй мастацкіх твораў, натуральнасцю інтэр’ера, багатай экспазіцыяй. Пяцікласнікі пазнаёміліся з жыццём  і творчасцю  знакамітага мастака, разгледзелі карціны сяброў жывапісца.  Вітольд Каэтанавіч вельмі любіў жыццё і даў людзям вялікае шчасце глядзець на прыроду яго вачыма, бачыць у ёй тое непаўторна-зменлівае, запаведнае і запаветнае, што хвалюе і прымушае мацней любіць Радзіму.  Любіць шчыра. Так, як мастак любіў квітнеючы яблыневы сад і пахучы бэз.  Асаблівую цікавасць выклікалі работы “Час цішыні, “Дзеці за піяніна”, “Дзяўчына, якая ўсміхаецца”, бо настраёвасць  карцін вяртае ў гады незабыўнага дзяцінства, сагрэтага ласкавай усмешкай і натуральнасцю пачуццяў, чысцінёй пачуццяў і сумленнасцю.
          Дзеці, уражаныя сустрэчай з высокім мастацтвам, неаднаразова паўтаралі: “Да сустэчы, музей! Да хуткай сустрэчы зноў!”

Настаўніца беларускай мовы і літаратуры,
класны кіраўнік 5 “В” класа
Алена Сяргееўна Кустава

 

 

<< Вернуться на предыдущую страницу